“Protest” Mitinq Komitəsi Xalqı Gəzintiyə Çağırdı

Əziz həmvətənlər!

Protest Mitinq Komitəsi olaraq mayın 19-da saat 17-də xalq gəzintisinə çıxmağı qərarlaşdırmışıq. Aksiya “Sahil” bağından başlayaraq bulvara qədər davam edəcək.

Bu yaxınlarda Rusiya Federasiyasının paytaxtında ziyalıların çağırışıyla keçirilən eyni tipli aksiyanın təcrübəsindən görüldü ki, keçmiş Sovet rejimindən qalan mənən çürümüş düzənlərə qarşı həyata keçiriləcək ən yaxşı mübarizə vasitələrindən biri məhz bu cür gəzintilərdir. Çünkü, heç bir siyasi tələb və şüarın səslənmədiyi belə aksiyalar qarşısında rejimin zor aparatı da öz fünksiyasını ititrir, xalq qarşısında geriyə çəkilməyə məcbur olur. Üstəlik etiraz səsini ucaltmaq istədiyi halda bu imkanı ədə edə bilməyən ictimaiyyət də həm gəzintiyə çıxaraq illərlə toplanmış stresini atır, milli həmrəyliyin əsası qoyulur, həm də rejimə qarçı mövqe ortaya qoya bilir.

Bu gün Azərbaycanın da bu cür mövqe nümayiş etdirməyə daha çox ehtiyacı var. Çünkü özünə hörmət edən bütün dünya dövlətləri artıq demokratik üsul idarələr qurur, mütərrəqqi islahatlar apararaq dünyanın aparıcı ölkələriylə ayaqlaşmağa çalışırlar. Bunadan fərqli olaraq bizim kimi ölkələrdə isə hər əzaba dözdüyümüzdən zülm ərşə dirənir.  Millətin sərvətləri bir ovuc zümrə tərəfindən talanır, iri-xırda məmurların intəhasız iştəhalarının qurbanına çevrilən xalqlar isə ona nicat yolu göstərəcək ziyalılara ümid bağlayır. Evi başına uçurulan məzlumların gözünün yaşı qurumadığı, bir tikə çörəyə möhtac vətəndaşların ziyalı münasibətinə son ümid yeri kimi baxdığı indiki məqamda kabinetlərindən çölə çıxmayan bir xislətlə demoktratik dünya düzənində yer almaq imkansızdır. Hər kəs Azərbaycan naminə əlindən gələni etməli,  ölkəmizin adının Şərq diktatorlarının idarə etdiyi ölkələrə eyni sırada çəkilməsinə səbr göstərməməlidir.

Biz məhz onun üçün xalq gəzintinsinə çıxacağıq ki, bizim adımızdan danışan, dünyada Azərbaycan xalqını təmsil edən şəxslər Cibuti, Konqo və s. respublikalarının rəhbərləriylə eyni sırada qəbul olunmasın. Biz ona görə bu gəzintiyə çıxmaq istəyirik ki, ölkəmizə təşrif buyuran xaricilər burada insanların mövcudluğunu görsünlər. Bu qədər zəngin təbii ehtiyatlara malik coğrafiyada milli iradəsi olan cəmiyyətin mövcudluğundan xəbər tutsunlar. Və bizimlə münasibətlərini də insani  keyfiyyətlərə görə müəyyənləşdirsinlər. Kimsə bu ölkə haqqında danışanda “Heydər Əliyevin 8 milyonluq sürüsü var”-deməsin. Kimsə sərvətlərimizi taladığı azmış kimi, bayrağımıza təhqiramiz gözlə baxmasın. Torpağımız ala biləcək, haqsızlığa, Allahsızlığa itiraz edəcək qüdrətimizin olduğunu  dərk etsinlər. Yəni , 19 mayda düzənləyəcəyimiz xalq gəzintisi yalnız mövcud rejimə qarşı da yönəlməyib. Həm də bu torpağı Vətən etməyi, insanlarının vətəndaşlıq hüququ qazanmağını hədəfləyib.

Məhz buna görə də heç kimin, xüsusilə də ziyalılarımızın bu aksiyadan kənarda qalmağa mənəvi  yoxdur.  Ən azı ona görə ki, ziyalı könlündə daşıdığı işıqla zülmət içərisində boğulan məmləkəti nura qərq etdiyi zaman öz həqiqi adına layiq ola bilər. Əks halda, nə onun özünün, nə də təmsil etdiyi millətin cəmiyyət adlandırılması mümkün deyil.  Deməli biz həm də bu aksiyaya MİİLLƏT ola bilmək adına çıxırıq.

Bu gün bizdən- ziyalılı, sıravili hər birimizdən MİLLƏT olma naminə fədakarıq tələb olunur. Bəyənmədiyimiz Yaxın Şərq xalqları belə artıq özlərinə başucalığı gətirməyən bu tipli rejimlərlə mübarizədə çox böyük fədakarlıq nümunəsi göstərirlər. Dövlətlərini kimlərinsə buxovundan çıxarmaq naminə hər gün onlarla, yüzlərlə insan həyatından keçir, azadlıqları uğruna ən dəyərli nemətlərindən imtina edirlər. Bizdən isə sadəcə gəzintiyə çıxmaq tələb olunur..

Yaxın Şərq xalqları qədər  fədakarlığa cəsarətimiz çatmırsa, heç olmasa fədakar insanların yanında olmaqdan, onlarla bərabər addımlamaqdan çəkinməməliyik. Əks halda hansı haqla bu Vətənin övladı olmaqdan danışıb sinəmizə döyə bilərik.

Biz Protest Mitinq Komitəsi olaraq hər kəsi bizimlə bərabər xalq gəzintisinə çağırırıq. Dinc və heç bir şüar səsləndirmədən, sadəcə yol boyu addımlayaraq demokratik dövlət quruculuğunun yanında olduğumuzu dünyaya, ondan əvvəl isə öz daxili vicdanımıza göstərmək üçün bu yürüşə ehtiyac var. Bəli, biz sadəcə MİLLƏT olduğumuza özümüzü inandırmaq üçün gəzəcəyik. Buyurun, Siz də bizə qoşulun. Heç olmasa millət ola bilmə adına qoşulun.

“Protest” Mitinq Komitəsi

 Xatırladaq ki, bu aksiya mayın 19-da “Sahil” bağından başlayaraq bulvara qədər davam edəcək. Heç bir şüarın səsləndirilməyəcəyi bu aksiya saat 17-00-da başlayacaq.